Gal 6 | GAM | STEP | Agana ambana kambono! Ye mor al ge una ta singare ke ta yenda ge, ye God Murble boll mor una ge, ye po iwa ge kandja kiye dje djine. Ba Satan ye kamalne tondaka, ye kulngab yago djine. Ye kanpol tane.

Galatians 6

Wal wopake yapon ge wopake boya, wal ke yapon ge ke mal boya

1 Agana ambana kambono! Ye mor al ge una ta singare ke ta yenda ge, ye God Murble boll mor una ge, ye po iwa ge kandja kiye dje djine. Ba Satan ye kamalne tondaka, ye kulngab yago djine. Ye kanpol tane. 2 Una imb kake mor ge, ye po amblo pille dje aune. Ye singare embe yene ge, Krais kandja lo dji mal ge, ye pille kane kune yene. 3 Iwa ta kerman namoya ba alla yene kerman moro we dji dal, yene kende dje inda. 4 Ye taimantaiman dje singare yenj ge, pai mal yenj mo napai mal yenj? Ye yenekne okum boye. Ni wopake yell dje kanin dal, ni wo pupen. Ni ga wopake yenj mo na wopake yendo ne dje kamalin ngundjo napupen. 5 Ge ye taimantaiman dje imbne wonda mal kakne. 6 God kandjiye beke ni aune una ge, ni ga ye wopake ye wal aumben. 7 Ni wal ipo mau al yapen wal ge boya, wal djell ta boya we djimben ba, ni God bakalo awo, kende dje nenem inden. 8 Iwa ta makimb nomane pai mal pille ipo wal yaya ba, megye ke mal tondaka une kondwe ke al punda. Ba alla, iwa ta God Murble kandja djinda mal pille ipo wal yaya ge, megye wopake tondaka, une gun molo pa moya. 9 Embe paro pille nono ye wopake ye una aumbon mal nakerbon. Nono kogke nayepin dal, megye tonda poke, wal merke i nambon. 10 Embe pille, kondwe yendaka nono una porapora ye wopake ye aumbon. Ba pillgi pai una nono kaima ye aumbon.

Jisas iko pera al goi ge Pol wopake pille awi

11 Na kandja ipon pepa bolo ye aundo ge, nanam aglena pall, mon kerman bolo pagro ge, ye kanme! 12 Pir mo? Kambono ye gaklene kelip tane dje pir una ge, Juda una wopake piye dje pille djinj. Juda una ye Krais iko al goi we dje pillgi djinj ge, tambon we dji pille, ga kand golo una gaklene kelip tane we dje waninj. 13 Yenekne gaklene al kelip toi una mor ba Mosis loye ge kambono amblo gi nadjinj. Kiwa, una nalene al yenekne kandjine amblo pla woro nono ga gaklene kelip topin we djimbon dje yenj. 14 Kambono kandjine amblo pla worinj mal ge na nayeno, man. Iwa Kerman Jisas Krais nono pille iko al goi iwa ge na une kandjiye amblo pla worno. Une na pille iko al goi ge, na nomana asa ke pai ge para goi pora dji. Alla makimb wal na nomana al nayero, makimb wal na kantau yei pora dji. 15 Ipon yero ge una gaklene al kelip toi mo kelip natoi moye ge wal kiwa. Wal kerman yero ge embe, God ye wordaka, nono nomane al ge gun panda mopon. 16 Una nomane gun pai mor una, God ye wopake ye awo, elle tukye wopake aunda moye. Ga yene unakye Israel una moye. 17 Na Jisas wombaye moll pille una na toi, kusye paro, ye na imb alla naune mal.

18 Agana ambana kambono, nono Iwa Kerman Jisas ye ellne tukne al molo, ye wandill golo aunda molme! Kaima.